Fyrstasjonen ligg nordvest på Bømlo ved innsiglinga til Selbjørnsfjorden. Det 25 meter høge støypejernstårnet, saman med resten av anlegget, stod ferdig i 1859. Det kraftigaste fyrlyset I landet, med høg 46 meter over havet, kan sjåast 18 nautiske mil frå kysten.
Til fyrstasjonen høyrer også maskinhus, bustadhus, to naust og steinlagde vegar mellom bygningane. I tillegg er her ymse installasjonar for vêrmåling.
Frå gamalt finn me dessutan terrasserte hageanlegg og tufter frå bygningar som vart rivne ved overgangen frå familie- til tørnstasjon i 1958. Frå okkupasjonstida finst restar etter forsvarsanlegg.
Slåtterøy fyr vart automatisert på 1980-talet og avbemanna sommaren 2003.
I 1999 vart stasjonen freda av Riksantikvaren med heimel i kulturminnelova, grunngjeve mellom anna med at fyrstasjonen "er et helhetlig anlegg med stor miljøskapende verdi".
Etter at stasjonen vart avbemanna, vart Venner av Slåtterøy fyr skipa våren 2004. Foreininga leiger ledige bygningar ved fyret av Kystverket Vest, og har som målsetjing å gjera bygningane tilgjengelege for folk flest og å formidla den fyrhistoriske kulturarven. Foreininga søkjer stadig entusiastiske medlemer, ta kontakt dersom du er interessert.
Ønskjer du opphald ved fyret, har huset sengetøy til ti personar, men plass til fleire om ein tek med seg sovepose.
Kontakt:
Venner av Slåtterøy fyr - 974 97 666. Styreleiar er Elisabeth Eriksen Meling.
Lenke: www.fyr.no