Hugs å sjekke røykvarslaren 1. desember

Brannkonstabel under slokking av husbrann. Ove Halleraker

– Her i vårt nedslagsområde rykka brannvesenet ut til åtte bustadbrannar i fjor. Dei siste fem åra har det vore til saman 40 slike utrykkingar, seier avdelingsleiar for brannførebygging Bjørn Hroar Sortland i Bømlo brann og redning.

Røykvarslardagen 

Røykvarslardagen er ein landsomfattande kampanje som går fast av stabelen 1. desember kvart år. Det er Brannvernforeningen, DSB og Gjensidige forsikring som står bak kampanjen sentralt. Lokalt er det brannvesenet og DLE (Det lokale El-tilsyn) som bidrar til å setje fokus på denne viktige bodskapen.

– Om røykvarslarane fungerer slik dei skal, så må dei høyrast tydeleg på opphaldsrom og soverom, òg når døra mellom romma er lukka. Alle må ha minst éin røykvarslar i kvar etasje. Dei fleste har fleire varslarar, og då tilrår me at dei er seriekopla slik at om éin piper, så piper alle. I tillegg til 1. desember, bør du testa røykvarslarane dine jamleg, samt etter at du har vore borte i ei veke eller meir, seier Sortland.

Ta ansvar for dine nærmaste                           

 Brannstatistikken viser at det er nokre risikoutsette grupper som er meir utsette og sårbare om ein brann inntreff. Det er blant anna eldre og personar med nedsett funksjonsevne.

– Mange av desse vil ha vanskeleg for å sjekke røykvarslaren(e) sjølve, og vi oppfordrar difor alle som har moglegheit til å hjelpe dei ein kjenner som kan tenkjast å slite med dette, seier Sortland. 

Nyttig informasjon om tiltak som betrar brannsikkerheita i heimen.