Ordførar Sammy Olsen sprettar kaka under overrekkjinga av miljøfyrtårnsertifikat til Bømlo kommunale eigedomsselskap AS (BKE). Dagleg leiar Ingrid Urheim Halleraker (t.v) og Birgitte Steinsland (t.h) deltok.
Simon Knutsson Sortland
- Tusen takk. Dette er stor stas for oss. Me har jobba ei tid med dette sidan me bestemte oss for også å ha eit grønt fokus i vår strategi. Det er Birgitte Steinsland som er vår "miljøfyrtårngeneral", takka dagleg leiar Ingrid Urheim Halleraker og overrekte ein blomebukett til medarbeidaren sin.
- Stadig fleire miljøfyrtårn
- Det er små grep som kjeldesortering og litt endra tankesett som skal til for å bli betre på miljøvern. Kommunen har som strategi å få alle kommunale tenester miljøfyrtårnsertifisert, og flest mogleg av verksemdene i næringslivet vårt. Ein del har oppnådd denne statusen, og fleire jobbar med det. Noko me sjølvsagt er svært glade for, sa ordførar Sammy Olsen under overrekkinga i BKE sine lokaler i Hollundsdalen. Han la til at sertifikatet må fornyast om tre år, så arbeidet må halda fram.
- Miljøansvar handlar om å ha eit kontinuerleg fokus på eiga drift for til ei kvar tid minimera belastningane ein påfører klimaet, omgjevnadane og arbeidsmiljøet. Å bli eit miljøfyrtårn er eit prov på at verksemda tek sitt miljø- og samfunnsansvar på alvor. Plaketten er eit synleg prov som viser dette til publikum og eigne ansatte, seier dagleg leiar Ann-Kristin Ytreberg i Stiftinga Miljøfyrtårn.