I helga var strøbilane ute når den første frosten kom. Måndag kveld kom det første snøfallet, og brøytebilane måtte i aksjon. I Hollundsdalen har teknisk drift sin base, og her rår orden. Det er driftsavdelinga og innleigde kontraktørar i Bømlo kommune som brøyter og strør kommunale vegar og plassar og rundt kommunale bygg.
Meir om vinterberedskap og vedlikehald på vegane
Må prioritere hardt
I den reine og ryddige hallen står hjullastar og traktor med brøyteskjer klar. Her er og ein liten lastebil for strøing og med brøyteskjer, samt ein liten sopebil. Den nyaste og store lastebilen med brøyteskjer og strøsand er klar utanfor. Det er driftsoperatør David Vassnes som har vakt på denne i dag. Han reknar med å måtte ta turen ut i kveldinga då den første snøen er varsla.
- Me har fem personar i beredskap, og kan kalla inn fleire om det vert behov. I tillegg har me kontraktørar på sju av våre åtte kommunale roder. Alle mann er friske per i dag, og eg vonar det held seg slik, seier avdelingsleiar Vardan Vardanyan. Han legg til at kommunen har beredskapsplanar for eventuelt langvarig snøfall.
Han reknar med at det kan kome telefonstorm i tillegg til snøstorm om folk blir misnøgde med brøytinga, men er klar på at kommunen må prioritere hardt.
- Kommunen tek kun for seg kommunale vegar om områder, ikkje private. Me har klare prioriteringar og rutinar me følgjer, men alle er ikkje klar over kva som er privat veg og kva som er kommunalt, seier Vardanyan.
Kommunen brøyter og strør i prioritert rekkjefølgje kommunale hovudvegar, skulevegar og institusjonsvegar. Deretter busslommer, sykkel- og gangstiar før dei tek hovudveger til og i kommunale bustadfelt. Bømlo kommune tek ikkje på seg brøyting eller strøing for private eller i private bustadfelt då ein har avgrensa kapasitet for både brøyting og strøing.
Gratis strøsand til eldre
Avdelingsleiaren ber også folk syna tolmod då det tek tid å rekkje over alt for å rydda unna snø og å strø vegane. Dette gjeld særleg ved større snømengder.
- Me held fram ordninga med gratis strøsand for eldre , legg Vardanyan til. Bømlo kommune tilbyr strøsand gratis for eldre pensjonistar. Henting av strøsand på tilvist stad i Hollundsdalen må vedkomande ordne sjølv. Det er også sett ut tre strøsanddeponi på Moster ved Teiglandshagen, ved Joker Finnås og på Espevær der dei eldre i områda kan hente strøsand.
Ei oppmoding til slutt: Når det blir glatt må folk syne ekstra varsemd i år for å unngå fallskader og beinbrot. Helsevesenet er som kjent hardt pressa allereie.