Kransalag for nybygg til rus og psykisk helse

Onsdag 24. august var det kransaskål for nybygget til rus- og psykisk helseteneste like ved Bømlo helsehus. Eit 40 tals inviterte gjester frå bygningsfolka, ordførar og administrasjonen i Bømlo kommune deltok. Prosjektsjef John Nordseth Nesse i Bømlo kommune gav stor honnør til dei 35 arbeidarane frå hovudentreprenør Engevik og Tislevoll og frå underentreprenørane. Han var glad for å kunne jobba med lokale, ærlege og pålitelege folk.

- Stor milepåle for kommunen

Bygget er på totalt 790 m2, med totalt budsjett avsatt av kommunestyret på 38 900 000 kroner inkl. mva. Avtroppande prosjektsjef Nesse takka for samarbeidet og var glad for å kunne vere med å markere denne store milepålen for kommunen før han overlet ansvaret til den nye prosjektleiaren Erlend Flornes Skaret. Deretter var det mat og kake frå Viergo før kommunalsjef for helse og omsorg Kjell Magnar Mellesdal fekk ordet.

- Rus- og psykisk helse er eit viktig tenesteområde i kommunen. Me har i lengre tid slitt med store plassproblem. Med dette nybygget vil me kunne gi betre tenester til brukarane og betre arbeidstilhøve for dei tilsette, seier Mellesdal.

Han peika også på at rus i dag er organisert under NAV, og med nybygget vil samordninga mellom desse tenestene bli betre no. Både fellesareal for møter mellom brukarar og tilsette, men og kontor for ein-til-ein møter. I tillegg gode møtelokaler som også andre helsetenester i området kan nytta seg av, og undervisningsrom for å byggja dei tilsette sin kompetanse. Aktivitetssenteret Nyving er inntil vidare på Sams senter, eit tilbod som stadig fleire nyttar seg av.

- Eg vil og få takka politikarane og ordføraren for støtta, og ikkje minst dei tilsette i kommunen som har vore med og fått realisert dette prosjektet, avrunda Mellesdal.