ByggjeavstandarNår du skal føra opp eit tiltak er det fleire krav som lyt følgjast, eit av dei er krav om avstand til mellom anna offentleg veg, offentlege straum-, vatn- og avlaupsleidningar, sjø, nabogrense og andre bygningar. Nedanfor finn du ei oversikt over ulike tilhøve som kan vera relevant å sjekka avstand til dersom du ynskjer å føra opp eit tiltak på eigedomen din. Før du går vidare er det viktig å setja seg inn i desse to begrepa: begrepet avstand er definert som følgjande "Avstanden måles som korteste avstand horisontalt mellom byggverkets fasadeliv og nabobyggverkets fasadeliv eller nabogrense. Dersom byggverket har utstikkende bygningsdeler økes avstanden tilsvarende det bygningsdelen stikker mer enn 1,0 meter fra fasadelivet", sjå byggteknisk forskrift, kapittel 6, § 6-3. begrepet byggverk er ein samlenemning for alle former for tiltak som er omfatta av plan- og bygningslova, ikkje berre bygningar. Plan- og bygningslova §29-4 rettar seg mot byggverk. Avstand til sjø Plan- og bygningslova § 1-8 Forbod mot tiltak mv. Langs sjø og vassdrag I 100-metersbeltet langs sjø og vassdrag skal det takast særleg omsyn til natur- og kulturmiljø, friluftsliv, landskap og andre ålmenne interesser. Andre tiltak etter pbl. § 1-6 fyrste ledd enn fasadeendring kan ikkje utførast nærare sjøen enn 100 meter frå strandlinja målt i horisontalplanet ved alminneleg høgvatn. Dette er likevel ikkje til hinder for frådeling ved innløysing av bebygd festetomt etter tomtefestelova. Forbodet etter andre ledd gjeld så langt ikkje anna byggjegrense er fastsett i kommuneplanens arealdel eller reguleringsplan jf. §§ 11–9 nr. 5 og 12–7 nr. 2. Sjekk kva som er gjeldande for din eigedom Finn eigedomen din på kommunekartet ved å leggja inn gards- og bruksnummer eller adresse. Skru på kommuneplan og reguleringsplan og sjekk i planarkivet kva som er gjeldande for din eigedom. Er det kommuneplanen som er gjeldande så kan du sjå her I gjeldande kommuneplan er det fastsett følgjande byggjegrenser mot sjø: §3.5.1 Alle tiltak i 100-metersbeltet må ha godkjent byggjeløyve. §3.5.2 Arbeid og tiltak i nye byggjeområde sett av til bustad- og fritidsbustadsføremål, samt frådeling til slike føremål, er ikkje lov nærare enn 50 meter frå sjø. §3.5.3 Arbeid og tiltak i eksisterande byggjeområde for bustad-/fritidsbygg, samt frådeling til slike føremål, er ikkje lov nærare enn 25 meter frå sjø. §3.5.4 For arbeid og tiltak i eksisterande fritidsområde med foremålsføresegn heilt til sjø, samt frådeling til slike føremål, følgjer byggjegrensa langs sjø føremålsgrensa for fritidsområde. §3.5.5 Arbeid og tiltak i nye og eksisterande LNF-område for spreidd bustadbygging, samt frådeling til slike føremål, er ikkje lov nærare enn 50 meter frå sjø. §3.5.6 For arbeid og tiltak i nye og eksisterande naustområde, samt frådeling til slike føremål, følgjer byggjegrensa langs sjø føremålsføregrensa for naustområde. §3.5.7 For arbeid og tiltak i område med kulturhistorisk verdi merka K i plankartet, samt frådeling til slike føremål, følgjer byggjegrensa langs sjø føremålsgrensa for desse områda. Det er særskilte føresegn for Espevær og tilliggjande øyar under punkt 4.5. Dette er eit utdrag av føresegna som er relevant i høve avstand til sjø: §4.5.1 Alle tiltak i 100-metersbeltet må ha godkjent byggjeløyve. §4.5.2 I område avsett til bustadføremål kan det førast oppbustader, uthus, garasjar og naust m/tilhøyrande kai. §4.5.4 Arbeid og tiltak i nye byggjeområde sett av til bustad- og fritidsføremål, samt frådeling til slike føremål, er ikkje lov nærare enn 25 meter frå sjø. §4.5.6 Arbeid og tiltak på eksisterande bygg er lov heilt til sjølinja i byggjeområdet, men nye bygningar, arbeid og tiltak som ligg nærare enn 25 m frå sjø er berre tillat der dei ligg i direkte tilknytning til eksisterande bygning. I urørt strandsone i byggjeområde gjeld byggjegrensa på 25 m frå sjø. Er det det ein reguleringsplan som er gjeldande så kan du sjå her Finn eigedomen din på kommunekartet ved å leggja inn gards- og bruksnummer eller adresse. Finn fram til kva reguleringsplan som gjeld for din eigedom. Har reguleringsplanen eiga byggjegrense mot sjø, så er det den som gjeld. Hugs og å lesa i føresegna for ditt område i reguleringsplanen, då det kan hende det står noko der i høve avstand til sjø. Har ikkje reguleringsplanen byggjegrense mot sjø, så gjeld det generelle byggjeforbodet i 100 meters beltet langs sjøen, sjå plan- og bygningslova §1-8. Er tiltaket i strid med fastsett byggjegrense eller manglar reguleringsplanen byggjegrense, og du er innanfor 100-metersbeltet til sjø? Då krev tiltaket du ynskjer å utføra dispensasjon. Du kan lesa meir om dispensasjon her. Avstand til offentlege vegar/ avkøyrsle Det er fastsett byggjegrenser langs offentlege vegar og avkøyrsle for å ivareta omsynet til trafikksikkerheit, drift og vedlikehald av veg, arealbehov ved framtidig utbetring, og miljøet på eigedomane langs vegen. Ligg eigedommen din i kommuneplanen? Kommuneplanen følgjer veglova sine generelle byggjegrenser mot offentleg veg. I høve avkøyrsle til kommunalveg så er det vegnorma i Bømlo kommune så gjeld. Veglova sine generelle byggjegrensene blir målt frå midten av vegen: 50 meter til midtlinje riksveg 50 meter til midtlinje fylkesveg 15 meter til midtlinje kommunalveg 15 meter til midtlinje gang- og sykkelsti Ligg eigedomen din i ein reguleringsplan? Det kan vera fastsett eigne byggjegrense mot veg og avkøyrsle. Finn eigedomen din på kommunekartet ved å leggja inn gards- og bruksnummer eller adresse. Finn fram kva reguleringsplan som gjeld for din eigedom. Har den byggjegrense mot veg og avkøyrsle så er det den grensa som gjeld. Hugs også å lesa i føresegna for ditt område i reguleringsplanen, det kan henda det står noko i føresegnene i høve avstand til veg. Har den ikkje byggjegrense mot veg eller avkøyrsle så er det veglova si generelle byggjegrense som gjeld. Ver merksam på at sjølv om nokre reguleringplanar opnar for å plassera enkelte tiltak over byggjegrensa så gjeld framleis avstandsføresegna i høve nabogrensa, sjå plan- og bygningslova § 29-4. Er tiltaket i strid med fastsett byggjegrense eller manglar reguleringsplanen byggjegrense? Då krev tiltaket du ynskjer å utføra dispensasjon. Du kan lesa meir om dispensasjon her. Aktuelle lovverk Veglova Plan- og bygningslova § 29-4 Avstand til offentlege vatn- og avlaupsleidningar Avstand frå bygning til VA-anlegg bør vera minimum 4 meter, med mindre anna framgår av plan, lokal VA-norm, dispensasjon eller avtale med leidningseigar. Vatn- og avlaupsanlegg bør ikkje byggast over, men om dei likevel må byggjast over bør dei leggjast i varerøyr, kulvertar eller tilsvarande. Er du i tvil, ta kontakt med BVA for å få ei førehandsmelding om vatn- og avlaupsledningar. Sist endra 18.01.2024 07:50