Din meining om reguleringsplanar

Her finn du reguleringsplanar som skal starta opp, og du finn ferdige framlegg til plan som er lagt ut til høyring og offentleg ettersyn. I begge tilfelle kan du påverka resultatet ved å gje ein skriftleg uttale.

Klikk her for å sjå kunngjeringar av reguleringsplanar.

Korleis uttalar eg meg?

Kommunen har eit eige nettbasert skjema for å levera skriftlege uttalar.
Klikk her for å få opp skjemaet for elektroniske uttalar

Du kan også senda merknadar med e-post til postmottak@bomlo.kommune.no, levera dei fysisk eller i posten til Rådhuset, Leirdalen 1, 5430 Bremnes. Merk at innspel til ein oppstartsvarsling skal du senda direkte til planleggjaren. Kvar enkelt sak vil opplysa om kven planleggjaren er og kontaktinfo.

Når arbeidet startar opp (ved varsel om oppstart)

Når du ser kunngjeringa, eller mottar varsel om oppstart har planen blitt vurdert av tiltakshavar (den som eig planen), deiras fagkunnige planleggjar, og kommunen sin administrasjon og eit politisk utval.

Likevel blir ikkje alltid alle relevante omsyn fanga opp, og ein god planprosess er ofte avhengig av innspel frå grunneigerar, naboar eller andre med generell eller spesiell interesse i utviklinga i eit område. Det er i oppstarten du har best sjanse for å påverka planen.

Derfor, viss du meiner at varselet om oppstart manglar noko, eller veit om noko som vil ha verknad på planen, så skriv det inn til planleggjaren innan fristen som blir gjeve. Fristen er vanlegvis seks veker. Planleggjar er då plikta til å ta stilling til merknaden, og kommentera korleis den er ivareteke i framlegg til plan.

Merk at oppstartsvarselet ber preg av at prosessen er i idefasen, og det vil ikkje alltid komma fram særleg mykje detaljar.

Ved høyring og offentleg ettersyn av framlegg til plan

Når framlegg til plan blir lagt ut til høyring og offentleg ettersyn kan du sjå meir detaljert kva som kjem kor. Dette er å rekna som eit framlegg som har blitt vurdert av tiltakshavar, planleggjar og kommunen.

Om du meiner at noko viktig er utelatt eller oversett, så skriv det inn til kommunen innan fristen som blir gjeve. Merknaden blir då vurdert av oss før planen blir fremja for endeleg vedtak.

Større endringar kan føra til ny høyring av planframlegget.

I einskilde tilfelle kan det også bli arrangert møter med planeigaren, kommunen og interesserte.

Klage på vedtak av reguleringsplan

Etter høyring og offentleg ettersyn blir reguleringsplanen, om alt er i orden, fremja for endeleg vedtak. Når planen blir vedteken har dei som er part i saka (grunneigar, nabo) eller har rettsleg klageinteresse tre vekers klagefrist, før planen blir rettskraftig.

Detaljert om klage på enkeltvedtak

Er du misnøgd med vedtaket av reguleringsplanen, så kan du klaga til oss.

Klagefrist

Fristen for å klaga er tre veker frå du fekk vedtaket. Klagen må vera postlagt før fristen går ut.
Dersom du ikkje har fått vedtaket, så er fristen for å klaga tre veker frå du blei kjent med vedtaket eller burde ha skaffa deg kjennskap om vedtaket.
Sjølv om du sender inn klagen for seint, kan me i nokre tilfelle etter ein konkret vurdering likevel behandla klagen. Klikk her for å sjå forvaltningslova om å klaga på vedtak etter fristen.

Kven kan klaga

For at me skal behandla klagen din, må du vera part i saka eller ha rettsleg klageinteresse.
For at du skal vera part i saka, må vedtaket retta seg mot deg, eller direkte gjelda deg.
For at du skal ha rettsleg klageinteresse må du ha ei tilknyting til saka. Du kan òg ha ei rettsleg klageinteresse om du ha ei viss tilknyting til saka. Dette gjeld naboar, gjenbuarar, bebuarar i nærområdet, velforeiningar og interesseorganisasjonar der saka råkar eigedomen fysisk (sol, luft, lys og skuleveg) eller økonomisk (konkurranseforhold og verdinedgang). Om du har rettsleg klageinteresse vurderer me i kvart enkelt tilfelle.

Slik klagar du

Klagen må vera skriftleg og sendt til oss som eit vanleg brev eller e-post.
Du må skriva at dette er ein klage.
Du må skriva kva vedtak du klagar på, til dømes saksnummer eller namnet på saka det gjeld.
Du må skriva kva tilknyting du har til saka, til dømes at du er nabo eller næringsdrivande i området.
Du må grunngje kvifor du klagar, og du må skriva tydeleg korleis du ønskjer at vedtaket skal bli endra.
Dersom du har ny informasjon som ikkje er omtalt i saka før, er det viktig at dette blir lagt saman med klagebrevet.
Klagen må vera underskriven av deg eller din fullmektig, til dømes advokat.
Dersom du vil be om at gjennomføringa av tiltaket blir stoppa til klagen er avgjort, må du leggja ved ei eigen grunngjeving for dette (utsett iverksetting av vedtak).

Kvar sender du klagen

Klage på e-post sender du til: postmottak@bomlo.kommune.no
Klage per brev sender du til: Bømlo kommune v/Arealbruk, Leirdalen 1, 5430 Bremnes

Klageinstans

Statsforvaltaren er klageinstans på vedtak etter plan- og bygningslova. Du sender klagen din til kommunen som deretter handterer den vidare.

Saksbehandlingstid

Klagen din blir vurdert av administrasjonen og deretter lagt fram for kommunestyre for handsaming. Me skal behandla klagen frå deg snarast råd og utan ugrunna opphald.

Aktuell lov

Klikk her for å lesa meir om klage og klagerett i forvaltningslova

Kommunen har eit eige nettbasert skjema for å levera klager.
Send klage

Sist endra 27.04.2023 13:32