Markerer frigjerings og veterandagen 8. mai

Elevar frå 7. trinn ved Gilje skule la ned krans på minnestøtta ved Bremnes kyrkje over dei falne i 2. verdskrig. (Arkivfoto) Simon Knutsson Sortland

- Det er ein spesiell situasjon rundt oss diverre, som gjer at det ikkje berre er 80-årsmarkeringa for frigjeringa vår som gjer det aktuelt å markera denne dagen, sa ordføraren til kommunestyret i sist møte.

Ordføraren legg ned kransar ved Moster gamle og nye kyrkje, Bremnes kyrkje og Blia-monumentet. Varaordføraren legg ned krans ved minnestøttene på Espevær, Bømlo og Lykling kyrkje. Heimevernet stiller med representantar ved alle markeringane. Dette er vår nasjonale frigjerings- og veterandag der me heidrar veteranar og krigsseglarane våre frå 2. verdskrig, alle som har delteke i internasjonale operasjonar for det norske flagg, og alle som har avtent verneplikta si i Noreg.

Elevar står for programmet

Ved minnestøtta ved Lykling kyrkje er det 5. trinn frå Våge skule som har programmet assistert av Våge skule musikklag. På Espevær og ved Bømlo kyrkje er det Hillestveit skule som står for programmet. På Moster vil skulen kopla på alle elevane for å dekka markeringa ekstra i høve 80-årsmarkeringa, og dei satsar på å få med delar av skulekorpset og at dei får i stand open kyrkje denne dagen.

På Svortland er det i år Bremnes ungdomsskule (BUS) og Meling skule som har ansvaret for markeringa. Dei byter med Svortland og Gilje skule anna kvart år. Dei startar ved Blia-monumentet der BUS har ansvaret. Det blir appell om vår lokale krigshistorie og prologen “Blia” av Vermund Trohjell. Meling skule har ansvaret for markeringa over falne under 2. verdskrig frå Bremnes sokn. Minnestøtta står like ved kyrkja. Bømlo kulturskule står for dei musikalske innslaga.

Gudsteneste og temakveld

Bremnes kyrkje skal ha gudsteneste på kvelden, der mellom anna Heimevernet vil danna flaggborg. Solistar er Arne Kvarven og Anna Lovise Anglevik Solberg (blås). Kollekten vil gå til Kirkens Nødhjelp.

Bømlo folkebibliotek vil i samband med 80-årsmarkeringa ha ein gratis temakveld “Eit tidsbilete frå krigen”. Det skjer onsdag 14. mai der Johanna Seim Hjelland kjem med forteljinga om sin far Peter Hermansen og familien si krigshistorie. Hermansen frå Lykling var prostiprest i Sunnhordland då han vart arrestert av tysk politi i 1942. Han sat i mange ulike fengsel på veg til fangeleiren Sachenhausen i Tyskland. Det første var fengselet på Stord. Ut frå ein svært spesiell grunn vart han sett fri før krigen var slutt.