Frode Urangsæter (FrP) har retta følgjande spørsmål til kommunestyret måndag 16. juni: Blir krav om merking og varsling i forbindelse med sprøyting av veikanter og annet areal fulgt?
Følgjer gjeldande regelverk
Teknisk drift gjennomfører i desse dagar sprøyting av plantevernmiddel langs enkelte kommunale vegar. - Dette skjer i samsvar med gjeldande regelverk og etter opplæring godkjent av Mattilsynet. Alt personell som utfører sprøyting har gjennomført kurs i bruk av plantevernmiddel, og følgjer dei retningslinjene dei har lært, seier verksemdsleiar Vardan Vardanyan ved Teknisk drift.
Merking og varsling blir gjennomført
Områda som blir sprøyta, blir merkte i tråd med krava. Merkinga blir sett opp slik at publikum unngår kontakt med sprøytetåke, og blir fjerna etter at arbeidet er avslutta. Dette er i samsvar med praksis som er gjennomgått på kurs, og som er vurdert som tilstrekkeleg for å ivareta tryggleiken.
- Sprøytinga blir utført om natta, under vindstille forhold. Dette gjer me for å minimera påverknad på folk og dyr, og for å sikra at middelet blir absorbert før det er ferdsel på vegane. I tillegg er mange insekt inaktive om natta, noko som reduserer risikoen for påverknad på insektlivet, understrekar Vardanyan.
Han legg til at dei freistar avgrensa bruken mest mogleg. Det blir ikkje sprøyta i nærleiken av skular, barnehagar, parker eller andre offentleg tilgjengelege område. Sprøytinga skjer berre under autovern langs vegar der det ikkje er mogleg å slå graset med maskin.
Lovleg plantemiddel under avvikling
Alternativet til sprøyting er å la vegetasjonen veksa fritt, noko som kan føra til redusert sikt og auka risiko for trafikkulukker. Manuell kantklipping er eit anna alternativ, men dette krev vesentleg meir ressursbruk og vil innebera høgare kostnader for kommunen. Middelet som blir brukt, er ikkje forbode. Roundup er i ein avviklingsfase, men er framleis lovleg å bruke fram til 31. januar 2026.