Formannskapet fremja og vedtok samrøystes torsdag 10. mars at Bømlo kommune er positive til å ta imot flyktningar utover det fastsatte antal vedteke i samband med kommunebudsjettet for 2022. Dei er samstemte i si fordøming av Russland sin militære aggresjon og krenkinga av Ukraina sin suverenitet.
– Bømlo kommune ynskjer å hjelpe til i denne akutte situasjonen som har oppstått i Aust-Europa, og er klare til å ta imot flyktningar frå Ukraina. Formannskapet i Bømlo kommune forventar at statlege mynde snarast får på plass planar og finansiering for korleis me skal løyse denne oppgåva slik at me kan setje naudsynte ressursar i kommunen i gang med dette viktige arbeidet. Lokale lag og organisasjonar bør involverast, heiter det mellom anna i vedtaket.
Kommunedirektøren fekk også fullmakt til å senda kommunalt overskotsmateriell til kjende mottakarar som kan sørge for ei nyttig bruk i Ukraina.
Stort engasjement
Under ordskiftet kom det klårt fram at private, bedrifter, lag og organisasjonar i Bømlo står klare for å bidra med det som trengst med omsyn til bustad, naudsynt utstyr og tilmed arbeidsplassar.
- Det kommunale apparatet er godt rusta for oppgåva, men det er avgjerande at me har struktur på hjelpearbeidet og går gjennom dei offisielle kanalane, understreka ordførar Sammy Olsen.