Namn med to eller fleire ledd har berre stor bokstav i første ledd, til dømes:
- Bømlo bu- og helsesenter
- Bømlo omsorgstun
- Bremnes ungdomsskule
- Teiglandshagen bufellesskap
Politiske utval, komitear og nemnder skal skrivast med liten forbokstav:
- kommunestyret
- formannskapet
- leiarmøtet
- fellesnemnda
- styringsgruppa
- utval for areal og samferdsel
- ungdomsrådet
- viltnemnda
Titlar
Titlar skal ha liten forbokstav. Dette gjeld òg når tittelen står under namnet på visittkort og som avsendar i brev.
- kommunedirektør
- kommunalsjef
- verksemdsleiar
- konsulent
Bygningar
Namnet på bygningar skriv me med stor forbokstav når den konkrete bygningen vert omtalt som særnamn, til dømes Rådhuset (men: Bømlo har eit rådhus). I samanstilling med Bømlo vert bygningsnamnet skrive med liten forbokstav. Til dømes Bømlo rådhus, Våge skule og Maurtua barnehage.
Lover og forskrifter
Det skal vere liten forbokstav i namn på lover, unnateke Grunnlova.
- plan- og bygningslova
- vegtrafikklova
- barnehagelova
- forskrift om bålbrenning
Stor forbokstav i namn på organ og institusjonar
Me skriv til dømes Kongen, Regjeringa, Stortinget, Fylkesmannen, Kyrkja, Hæren, Høgsterett med stor bokstav når dei blir brukte som institusjonar. Me skriv staten, statsministeren, departementet, kommunen, politiet og kommunedirektøren med liten forbokstav.
- Er det snakk om eit konkret embete, skriv me Statsforvaltaren (tidlegare Fylkesmannen) med stor S: Eg fekk eit brev frå Statsforvaltaren i Vestland. Vedtaket frå Statsforvaltaren er...
- Er det snakk om personen, skriv me statsforvaltaren med liten s: I går drakk eg kaffi med statsforvaltaren i Vestland.
- Er det snakk om forvaltingsorganet generelt, og ikkje eit konkret embete, skriv me statsforvaltaren med liten s: Det er statsforvaltaren/statsforvaltarane som har ansvar for dette.