Utsleppsløyve mindre anlegg

• Eit mindre avlaupsanlegg kan ta i mot sanitært avlaupsvatn for inntil 50 personekvivalentar (50 pe).
• Som standard reknar me 5 personar per bustad. Det er også nyttig å rekna tal sengjeplasser i bustaden/fritidsbustaden.
• Bømlo kommune har utarbeida eiga lokal forskrift som gjeld for slike anlegg. Du finn vår lokale forskrift her. (PDF, 8 MB)
• Mindre avlaupsanlegg vert behandla etter kapittel 12 i forureiningsforskrifta der kommunen er forureining- og avgjerdsmynde. 
• Dersom anlegget skal ta i mot utslepp frå fleire enn 50 personar, så skal anlegget behandlast etter kapittel 13 i forureiningsforskrifta. Kommunen er framleis forureining- og avgjerdsmynde, men saksprosessen er meir omfattande.
• Les meir om mindre avlaupsanlegg hjå miljødirektoratet.

Du må få hjelp frå fagkyndig firma til å prosjektera anlegget ditt og til å senda inn søknad om utsleppsløyve. Vanlegvis kan ein entreprenør eller eit røyrleggingsfirma hjelpa deg. Det kan ta litt tid å skaffe naudsynt informasjon, så det er lurt å starta prosessen tidleg.

I Bømlo kommune er det vanleg å senda inn søknad om utsleppsløyve saman med byggjesøknaden.  Du må knyta til deg ein kvalifisert søkjar som skal vera bindeledd mellom deg og kommunen.  Den som søkjer for deg må oppfylla kvalitetskrava som er sett i plan- og bygningslova.

Forureiningsforskrifta krev at alle nye reinseløysingar skal ha dokumentasjon gjeve av nøytrale fagkyndige. Du står fritt til sjølv å velja fagkyndig firma. Firmaet skal etablera den reinseløysinga som er best eigna ut frå naturgjevne føresetnader på tomta di, miljøet i området der du bur og din økonomi.

Grunntilhøva på eigedomen og avstand til ulike brukarinteresser, slik som til dømes drikkevatn, badeplass og jordvatning, bestemmer kva avlaupsløysing du bør velja og kor anlegget kan plasserast. Avlaupsanlegget og utsleppet må ikkje bli til ulempe for omgjevnaden. På Bømlo kan du i hovudsak bruka slamavskiljar eller minireinseanlegg på anlegget ditt før utslepp til grunn, bekk eller sjø.

NIBIO har god informasjon om avlaupstemaet på deira nettside.

Eit fagkyndig firma hjelper deg med å få gjennomført grunnundersøking, prosjektering av anlegget og sender inn søknad om utsleppsløyve. Søknaden blir behandla av bygningsmynde i Bømlo kommune. Me kan gje noko vegleiing undervegs.

Du kan gjera ein stor innsats for å betra vasskvaliteten i lokale bekkar, elvar og innsjøar ved å installera eit moderne avlaupsreinseanlegg i bustaden din. Det gjev målbare resultat på vasskvalitet og vassmiljø. Avlaupsvatn er det vatnet som har blitt brukt inne i huset til toalett (svartvann), bad, vaskerom eller kjøkken (gråvann). Det inneheld fosfor, nitrogen, organisk materiale og sjukdomsframkallande bakteriar. Eit avlaupsreinseanlegg reinsar avlaupsvatnet.

Før fagkyndig firma kjem på synfaring til deg, bør du tenkja gjennom følgjande spørsmål:

a) Er det aktuelt med felles avlaupsløysing med naboar?

Felles reinseanlegg for fleire bygningar/bueiningar er både miljømessig og økonomisk det beste. Reinseanlegg som tener fleire hus får jamnare tilføring og har difor betre reinseresultat. Kostnaden ved både etablering og drift blir lågare når de deler avlaupsanlegget.

Større fellesløysingar bør organiserast juridisk i sameige eller andelslag.

b) Kvar kan eg sleppa ut reinsa avlaupsvatn?

Bømlo kommune si lokale forskrift om utslepp av sanitært avlaupsvatn frå bustadhus, hytter, naust og liknande gir føringar for kva løysing du kan ha. Du finn avlaupsforskrifta vår her. (PDF, 8 MB)

Generelt sett kan du kan sleppa ut avlaupsvatn via slamtank/minireinseanlegg:

• til grunnen i stadeigne lausmasser.
• til sjø eller ferskvatn.
• til elv med heilårs vassføring.

Utslepp av slamavskilla avlaupsvatn kan infiltrerast i grunnen der lausmassane er eigna for dette (sandholdige jordmassar). På Bømlo har me nok ikkje mange slike stadar som er eigna til dette. For å avklara dette, må fagkyndig firma gjennomføra grunnundersøkingar på eigedomen. Der kor lausmassane ikkje er eigna for infiltrasjon, må avlaupsvatnet reinsast før utslepp til grunnen, eller til sjø/elv.

c) Kvar bør reinseanlegg og tank plasserast?

Det trengs tilgjengelege areal for anleggsdeler som slamavskiljar, pumpekum, infiltrasjonsgrøft og reinseanlegg. I tillegg må det heile året vera høve til tilkomst til anlegget for slamtømming, drift og vedlikehald. Terrengtilhøva avgjer om avlaupsvatn kan leiast med sjølvfall til reinseanlegg. Dersom sjølvfall ikkje er mogleg må ein bruka pumpe. Anlegget skal leggjast med minimum avstand til nabogrense på 4 meter, dersom du ikkje får ordna deg anna avtale med nabo. Dersom anlegget skal leggjast på annan manns grunn, må du ha tinglyst erklæring om dette. Det kan også vera arealplanar eller reglar for området som har betydning for valg av avlaupsløysing.

d) Kor mye vil det kosta å etablera og drifta ulike typar avløpsanlegg?

For informasjon om ulike typar avlaupsanlegg og kostnads-vurderingar viser me til nettstaden til NIBIO. Dei har lagt ut ein samanlikning av gjennomsnittlege kostnader for ulike reinseløysingar. Oversikta til NIBIO finn du her. Det vil vera mykje å spara i investeringskostnader dersom fleire kan dela på anlegget.

Før du kan byggja eit nytt avlaupsanlegg eller utvida ditt gamle anlegg må du søkja til bygningsmynde i kommunen.

Du må søkja om følgjande:

a) utsleppsløyve etter forureiningsforskrifta 

og

b) byggjesøknad etter plan- og bygningslova

c) eventuelt løyve etter hamne- og farvasslova ( leidningar i sjøen)

Du må få hjelp frå nøytralt fagkyndig firma til å utarbeida og senda inn søknad om utsleppsløyve. Nabovarsel for avlaupsanlegg har fire vekers svarfrist. Søknad om utsleppsløyve har inntil seks veker saksbehandlingstid.

Rettleiing til søknad om utsleppsløyve (PDF, 566 kB)

Søkja om utsleppsløyve

Her er ei enkel liste som kan følgjast når du ønskjer å leggja inn vatn eller oppgradera det eksisterande anlegget ditt:

• Sjekk først med Bømlo vatn- og avløpsselskap AS om du kan knyta deg til den kommunale leidningen.
• Sjekk om det er tilhøve ved eigedomen din som er til hinder for gravearbeida. I kommunen sin kartdatabase kan du finna kommuneplanen, reguleringsplan, naturverdiar, leidningsnett, kulturminne og mykje meir. 
• Du må gjera deg kjent med Bømlo kommune si lokale forskrift for utslepp frå mindre avlaupsanlegg. Vår lokale avlaupsforskrift finn du her. (PDF, 8 MB)
• Du må ta kontakt med ein eller fleire aktørar som kan vera den som søkjer til kommunen for deg. Du må også ha nokon som kan prosjektera og byggja anlegget. Du bør velja nokon som kan leggja fram at dei har kompetansebevis, enten gjennom formell utdanning eller gjennom tidlegare prosjekt. 
• Du må ha avtale med grunneigar eller leidningseigar dersom du skal leggja leidningen/anlegget over annan eigedom eller om du skal kopla deg på eit eksisterande privat anlegg.
• Søkjaren sender utsleppssøknaden med alle naudsynte vedlegg til kommunen.

Søknaden må innehalda:

• gards- og bruksnummer og adresse på bygningen som skal knytast til avlaupsanlegget
• opplysningar om søknaden gjeld nytt utslepp, vesentleg auke av eksisterande utslepp eller endring/rehabilitering av eksisterande avlaupsanlegg.
• forventa storleik på utsleppet (tal personekvivalentar). Som standard reknar me 5 pe for hus og 2,5 pe for felles reinseanlegg med kapasitet over 50 pe.
• opplysningar om deg som eig anlegget (ansvarleg søkjar)
• tilhøvet til gjeldande arealplan som gjeld for eigedommen (reguleringsplan/kommuneplan)
• informasjon om utsleppstaden: om avløpsvatnet går til sjø, bekk, vassdrag og så vidare. Du må visa heile plasseringa av avlaupsanlegget med tilhøyrande leidningstrase på eit kart.
• reinsegrad av anlegget du søkjer om (leverandør kan gje deg slike opplysningar)
• nødvendige vedlegg
  • Informasjon om fagperson/føretak som har utforma og dimensjonert anlegget
  • Dokumentasjon av reinsegrad for den avlaupsløysinga du søkjer om
  • Plassering av avlaupsanlegget med tilhøyrande leidningar på eit kart.
  • Oversikt over kva eigedomar som brukar/skal bruka same avlaupsanlegg som deg
  • Andre interesser som søknaden kan komma i konflikt med t.d. drikkevassforsyning (private brønnar), badeplassar, friområde osb.
  • Oversikt over kven som er nabovarsla
  • Kopi av protestar/merknadar til søknaden din