Bømlo kommune er effektive og leverer gode tenester

Bømlo kommune har ein effektiv administrasjon og leiing som saman med sine tilsette leverer gode tenester til innbyggjarane. Med låg kostnad, god kvalitet og økonomistyring har kommunen funne ein balanse som gjer at ein får mykje att for pengane syner målingar. Men framover ventar krevjande prioriteringar.

to sjukepleiarar klar med matservering - Klikk for stort bileteTo av våre tilsette som bidreg til kvalitet og effektivitet i tenesteytinga til Bømlo kommune er helsefagarbeider Marlen Vorland (t.v) og Anja Nilsson. Simon Knutsson Sortland

- Det er dei tilsette sin iherdige innsats kvar einaste dag for å gje innbyggjarane våre gode tenester som skal ha æra for dette, meiner kommunedirektør Kjetil Aga Gjøsæter.

Effektiv administrasjon og leiing

I Agenda Kaupang si ferske analyse “Norges best styrte kommuner: Kommuneindeksen 2025” kjem Bømlo på 13. plass av 356 kommunar når det gjeld effektivitet innan administrasjon og leiing. Dette kom fram på ein kommunal konferanse nyleg der tala frå undersøkinga vart presentert. I ei anna måling, Kommunebarometeret presentert av Kommunal rapport, kjem Bømlo kommune på 38. plass på landsbasis innan administrasjon. (Sjå faktaboks under).

Kommunen har låge administrasjonskostnader per innbyggjar og eit tenestetilbod som held god kvalitet. Budsjettframlegget for 2026–2029 viser eit positivt driftsresultat på over 24 millionar kroner, og kommunen held fram med handlingsregelen som sikrar ansvarleg gjeldsforvaltning.

Framtidsutsikter

Framover står kommunen overfor demografiske endringar, med fleire eldre og færre i yrkesaktiv alder. Dette krev ei omfordeling av ressursar frå oppvekst til helse og omsorg.

Kommunen planlegg investeringar i omsorgsbustader, velferdsteknologi og styrking av heimetenester – tiltak som skal møte framtidige behov på ein berekraftig måte. Samtidig blir det sett i gang ei ny tiltakspakke for å effektivisere drifta ytterlegare, med mål om å omstille stillingar og styrke helse- og omsorgstenestene.

mange folk rundt møtebord og storskjerm - Klikk for stort bileteKommunedirektør Kjetil Aga Gjøsæter orienterer administrasjonsutvalet om drifta i Bømlo kommune. Simon Knutsson Sortland

Fare for ROBEK

Ved utgangen av september 2025 hadde kommunen eit mindreforbruk (eit overskot) på 6,1 millionar kroner. Prognosen for året viser likevel at ein går i 0, mot budsjettert eit overskot på 12,3 mill, for å akkurat unngå ROBEK. Differansen mot budsjett skuldast hovudsakleg lågare inntekter frå flyktningtilskot, auka pensjonsutgifter og endringar i refusjonar.

I dette biletet er det likevel verdt å merka seg at kommunen har spart 24 millionar kroner og hatt 33 millionar kroner i mindre inntekter i 2025. Formannskapsmedlemer gav stor ros til administrasjonen og dei tilsette som har jobba knallhardt for dette resultatet i krevjande tider. - Me styrer ikkje etter å unngå å hamna på ei liste, så difor er det klart at denne jobben er særs viktig om det vert ROBEK eller ikkje, sa ordførar Morten Helland i møte med administrasjonsutvalet. Her deltek formannskapet og dei hovudtillitsvalde. 

grafar som illustrerer effektivitet - Klikk for stort bileteEffektiv administrasjon og leiing i Bømlo kommune syner rangeringa på Agenda Kaupang sin kommune i 2025.

Agenda Kaupang sin kommuneindeks

“Norges best styrte kommuner: Kommuneindeksen 2025” er ei samanlikning av norske kommunar, basert på om lag 84 nøkkeltal for kvalitet i tenestene, i tillegg til eigne indikatorar for kostnadar og finansar. Føremålet er å gje beslutningstakarar eit lettfatteleg og empirisk forankra bilete av korleis kommunen presterer som tenesteytar. Indeksen er utvikla av Agenda Kaupang for Storebrand Livsforsikring, og omfattar 16 kommunale tenester som grunnskule, barnehage, helse, pleie og omsorg, brann/redning, samferdsel og administrasjon. Tala er i hovudsak henta frå KOSTRA, med tillegg frå direktorat og andre offisielle kjelder. Tjenestene blir vekta etter kor stor del av kommunens budsjett dei utgjer, og kvalitet, kostnadar og finansar tel like mykje i den samla vurderinga. 

Les heile tabellen Kommuneindeks 2025

Kommunebarometeret

Kommunebarometeret er ei samanlikning av alle kommunane i landet, basert på til saman 157 nøkkeltal innan 12 ulike sektorar. Føremålet er å gje beslutningstakarar ei lettfatteleg og tilgjengeleg oversikt over korleis kommunen driv. Tala er i hovudsak henta frå Kostra-databasen til Statistisk sentralbyrå, med tal for 2024. I tillegg er det brukt statistikk frå kjelder som Utdanningsdirektoratet, Helsedirektoratet, Folkehelseinstituttet og Norsk kulturindeks frå Telemarksforsking.