Flytt til Bømlo og få sletta studielånet

Er du nyutdanna og vurderer å flytte til Bømlo kommune? Då kan du ha rett på sletting av studielån på visse vilkår. Over tid kan du spara fleire hundre tusen kroner. Du kan få sletta lån kvart år til det er nedbetalt.

Frå 1. januar 2025 har regjeringa innført ei ordning som gjer det mogleg å få sletta 25 000 kroner av studielånet årleg for dei som bur i ein av dei minst sentrale kommunane i Noreg, inkludert Bømlo.  Dette betyr at gjeldssletting tidlegast skjer frå 1. januar 2026. Du må oppfylla ein del krav kvart av åra for å få sletta 25 000 kroner til du har betalt ned heile gjelda. Sjekk faktaboks i denne artikkelen og les meir på Regjeringa.no

collage av ulike yrkesutøvarar i kommunen - Klikk for stort bileteSamling yrkesutøvarar i Bømlo kommune.

Gjeld dette meg?

For å kvalifisere til denne ordninga må du:

  • Vere busett i Bømlo kommune i minst eitt år.
  • Vere yrkesaktiv etter at du har starta å nedbetale studielånet.

Fordelar for nyutdanna 

Denne ordninga er spesielt gunstig for nyutdanna som ønskjer å etablere seg i distrikta. Ved å flytte til Bømlo kan du spara fleire hundre tusen kroner over tid, noko som kan gi ein god start på arbeidslivet og økonomisk tryggleik. Oppteningsperioden startar frå 1. januar 2025, og du kan få sletta delar av studielånet kvart år til det er nedbetalt. Dette tiltaket er ein del av regjeringa si satsing på å styrke kompetansen og busettinga i distrikta.

Kvifor Bømlo? 

Bømlo kommune byr på vakker natur, eit rikt kulturliv og gode moglegheiter for arbeid innan ulike sektorar. Ved å flytta til oss kan du ikkje berre nyte godt av økonomiske fordelar, men også oppleve ein høg livskvalitet i eit trygt og inkluderande lokalsamfunn.

Så, kva ventar du på? Ta steget og flytt til Bømlo – det kan lønne seg på fleire måtar!

Fakta om den nye ordninga

  • Alle kommunar i sone fem og seks i SSBs sentralitetsindeks er omfatta av ordninga. Det er totalt 189 kommunar utanom innsatssona.
  • For å kvalifisere for sletting av gjeld må ein ha budd i ein av kommunane i minst eitt år og vore yrkesaktiv etter du starta å nedbetale studielånet. Det er ingen krav til kva kommune ein jobbar i.
  • Oppteninga startar frå og med 1. januar 2025, som gir gjeldssletting tidlegast 1. januar 2026.
  • Oppteninga knytast til folkeregistrert adresse, og gjeld frå dato til dato i eitt år, uavhengig av kva dato flytting blir meldt.
  • Kravet om oppteningsperioden på 12 månader er same vilkår som gjeld for den eksisterande ordninga for sletting av gjeld i Finnmark og Nord-Troms.
  • 25 000 kroner blir sletta for dei som oppfyller vilkåra kvart år til ein har betalt ned heile gjelda.
  • Alle typar utdanningsgjeld frå Lånekassen kan slettast, uavhengig av om den stammar frå grunnskule- eller vidaregåande opplæring, høgare yrkesfagleg utdanning, høgare utdanning, eller andre utdanningsformer. Det er ingen krav til når gjelda blei teken opp.
  • Denne nye ordninga for sletting av studielån kan kombinerast med ordningane for sletting av studielån, både for nyutdanna lærarar og for lærarutdanna med spesialisering i realfag, framandspråk, samisk eller kvensk.
  • For dei som bur i dei 25 kommunane i Finnmark og Nord-Troms, aukar regjeringa beløpet som kan slettast frå 30 000 til 60 000 kroner per år, også frå 2026. Dei som jobbar som kvalifisert lærar i ein grunnskule i desse kommunane kan få ytterlegare 20 000 kroner av studielånet sletta kvart år.

Sjå våre ledige stillingar

Sist endra 07.08.2025 14:52