Framsnakkar faget og kollegaene sine

- Me ynskjer å fremja faget vårt og syne kor stor pris me set på dei gode kollegane våre, fortel kreftsjukepleiarane Vivian Bærøy og Martha Fylkesnes Nesse. Onsdag 29. oktober markerte dei Verdsdagen for lindrande behandling på Bømlo bu- og helsesenter med nysteikte vaflar og muffins, stort premiebord og tilmed eit lukkehjul. 

to sjukepleiarar bak basarbord med gevinstar og vafler - Klikk for stort bileteKreftsjukepleiarane Vivian Bærøy (t.v) og Martha Nesse Fylkesnes ville setje fokus på lindrande behandling og gjere stas på sine gode kollegaer med stands og undervisning på Verdsdagen for lindrande behandling 29. oktober. Simon Knutsson Sortland

Dei tilsette fekk seg ein lunsj litt utanom det vanlege på  Bømlo bu- og helsesenter denne onsdagen. Forutan den herlege lufta av nysteikte vaflar og fersk kaffi i foajeen hadde dei rigga seg til med stort premiebord og eit lukkehjul. Her var pynta med kvit duk og ballongar.

- Me vil gjere litt stas på kollegane våre som me jobbar med i kvardagen og setje fokus på faget vårt med undervisning og invitasjon til å stilla refleksjonsspørsmål, seier kreftsjukepleiarane Vivian Bærøy og Martha Fylkesnes Nesse.

Undervisninga gjekk på korleis ta vare på pårørande og seg sjølve i møte med lindrande behandling. Det var lagt ut informasjonsmateriell på standen, og alle som skreiv ned sine refleksjonsspørsmål vart med i trekninga av flotte premiar.

- Lokale verksemder er sp positive og imøtekomande, så me fekk inn mange flotte premiar, takkar Vivian og Martha.

Verdsdagen for lindrande behandling - 14. oktober

Kvart år i oktober vert det sett fokus på palliasjon – det vil seia lindrande behandling og omsorg for menneske som lever med alvorleg sjukdom. Målet er å auka kunnskapen og medvitet både i befolkninga og i helsetenesta.

Temaet for 2025 er: «Nærmiljø som bryr seg – du kan bety noko for naboen din». Dette peikar på kor viktig det er med støtte frå dei rundt, og at alle kan spela ei rolle i å skapa eit omsorgsfullt nærmiljø.

Dagen vert markert på ulike måtar over heile landet, til dømes med:

  • Standar på sjukehus og helsesenter
  • Foredrag, samtalar og musikkinnslag
  • Undervisning om korleis ein kan ta vare på pasientar og pårørande
  • Sosiale samlingar som vaffellunsj og refleksjonsaktivitetar

Palliasjon handlar om å gi best mogleg livskvalitet gjennom heile sjukdomsforløpet – ikkje berre i livets sluttfase. Det omfattar både fysisk, psykisk, sosial og åndeleg støtte.