Kontaktlærar Signe Dørheim med velkomst for ny 1. klasse ved Hillestveit skule. Arkivfoto.
Simon Knutsson Sortland
- Dette er gode nyhende for oppvekstsektoren og Bømlo, seier kommunalsjef for oppvekst, kultur og idrett Torunn Laurhammer.
Bømlo kommune har ved utgangen av 3. kvartal i år 12459 innbyggjarar mot 12364 ved inngangen av dette året som gir ein folkevekst på 95, eller 0,8%. Til no er fødselsoverskotet 18, og netto innvandring inkludert inn- og utvandring er 76 personar. Det er høgast i Sunnhordland, berre prosentvis slått av Tysnes kommune sine 1,7% eller 50 nye innbyggjarar til totalt 3036. Stord har hittil i år ein reduksjon i folketalet på 37 og tel no 19317 innbyggjarar.
Jobbar med attraktivitet
Ordførar Morten Helland gler seg også over dei positive fødselstala. Han er om ikkje uroa så i alle fall oppteken av at me må følgja nøye med på innanlandsk flytting. I haustkvartalet er det fleire som flyttar ut enn inn av kommunen, og ein god del av dette er studentar. Det er òg grunn til å tru at busette flyktningar etterkvart flyttar til andre deler av landet for til eit større miljø frå heimlandet og jobbmoglegheiter.
- Me må stadig jobba med attraktiviteten vår for å få nye tilflyttarar og tidlegare bømlingar til å flytta heim igjen, understrekar ordføraren.
Utviklinga i folketalet for 2025 pr kvartal og hittil i år.