Bømlo har ei lang og flott kystlinje, men dessverre driv det jamleg i land marint avfall. Kanskje har du lagt merke til ein stad som treng rydding langs ei turløype, i nærmiljøet ditt eller på ein båttur?
Både innbyggjarar, lag, organisasjonar og skular kan delta i ryddeaksjonen Rein Hardangerfjord. Deltakarar kan hente sekkar, hanskar og storsekkar (big bags) kostnadsfritt på rådhuset etter avtale med kommunekontakt.
Det innsamla avfallet kan leverast i container på Svortland som vil vera tilgjengeleg mellom 14. og 20. september. Det er mogleg å få dekka utgifter til mat og drikke med inntil 150 kroner per person.
Den offisielle aksjonsdagen for Rein Hardangerfjord er 17. september, men ein står fritt til å rydde andre dagar i løpet av veka.
Har du lyst til å delta? På nettsida til Framtidshavet finn du informasjon om registrering av ryddeaksjonar, kommunekontakt for Bømlo kommune, containerplassering og andre praktiske opplysningar. Du kan også følgje Rein Hardangerfjord på Facebook og Instagram.