Legg opp til pluss i budsjettet for 2026

Ordførar Morten Helland og kommunedirektør Kjetil Aga Gjøsæter under kommunedirektøren sin presentasjon av årsbudsjett og økonomiplan 2026-2029. Simon Knutsson Sortland

Kommunedirektør Kjetil Aga Gjøsæter presenterte måndag ettermiddag eit stramt budsjettframlegg for kommunestyret, men understreka likevel at me i 2026 skal bruke tett opp til 1,1 mrd på tenester til innbyggjarane i Bømlo kommune.

Kommunedirektøren sin budsjettpresentasjon årsbudsjett og økonomiplan 2026-2029 (PDF, 8 MB)

Sjå arkivopptak frå presentasjonen og kommunestyremøtet 20. oktober 2025

- Dette er eit budsjett kor me langt på veg held på tenestenivået slik det er i dag, og som styrkar fleire driftsområde, men det er òg område vi gjerne skulle ha styrka meir, seier kommunedirektøren. Han peikar særleg på behov innan oppvekst, som fysiske læremiddel i skulen og bemanning i SFO, samt innan helse, som heimeteneste, nattbemanning ved Teiglandshagen og BBH, og tidleg innsats.

For å sikra balanse i økonomien, føreslår kommunedirektøren å auka eigedomsskatten med 0,5 promille frå 2026, slik at satsen blir 3,7 promille for bustad og 5,0 for næring. I forhold til vedtatte økonomiplan, som i 2026 skulle redusert eigedomsskatten til 2,7 promille i 2026, vil dette gi kommunen 12 millionar kroner ekstra til nødvendige tenester. Han understrekar at endeleg statsbudsjett og nasjonale satsar for barnehagar kan påverke det lokalpolitiske handlingsrommet før endeleg budsjettvedtak 8. desember.

Framsikt - Kommunedirektøren sitt forslag til årsbudsjett og økonomiplan 2026-2029

Held på Våge skule

Våge skule. Simon Knutsson Sortland

Budsjettframlegget held fast på “Handlingsregelen”, der kommunen ikkje tek opp meir gjeld enn det som blir betalt i avdrag. Det blir rom for mindre investeringar i 2026, med god tilskotsfinansiering frå staten, mellom anna til pasientvarslingsanlegg ved Bømlo sjukeheim. 

Våge skule er framleis den største investeringa i perioden. Andre planlagde investeringar er dagtilbod på Moster (2028), forsterka skjerma eining på Teiglandshagen (2029), bustader for yngre med nedsett funksjonsevne (2028) og ny brannbil til stasjon Langevåg (2029).

Nye tiltak 

Kommunen vil mellom anna starta eit arbeid med mål om å redusera 6-8 stillingar for å styrke helse og omsorg framover. Dette skal skje gjennom omstilling, teknologiske gevinstar og tett dialog med tillitsvalde. 

I si oppsummering ser kommunedirektøren positivt på utviklinga. Med eit positivt driftsresultat som dekkjer meirforbruket for 2024, kan eit eventuelt seinare overskot nyttast til å styrka kommunen sin økonomi. Frå 2027 er det venta styrka resultat og auka fond. Dette føreset ei mellombels auke i eigedomsskatten for å sikre balanse. Budsjettet legg òg opp til styrka likviditet og redusert behov for likviditetslån, og gir kommunen betre evne til å gjennomføre større investeringar over tid.

Målsetjing innan rekkevidde

Prognosen for driftsresultat for 2025 er positiv med 7,7 millionar kroner. Kommunen må oppnå eit resultat på kr 12,3 millionar får å unngå ROBEK registrering. Dersom dagens prognose står seg, vil kommunen ende med eit positivt driftsresultat i 2025, men ikkje er eit resultat sterkt nok til å unngå ROBEK all den tid me må gjere avsetting på kr 12,3 millionar for å unngå dette.  

- Framleis er det slik at målsetjinga for inneverande år kan nås. Uavhengig av dette er det grunn til å understreke at det er  gjort ein formidabel jobb i tenestene med sjukefråvær, effektiv drift og omstilling, noko som viser igjen i prognosen for driftsresultat for kommunen. Framtida vil vise om det er tilstrekkeleg til å unngå det statlege registeret over kommunar som er i økonomisk ubalanse. 

Stramt budsjett – kva betyr det for deg?

Bømlo kommune må dei neste åra ha eit stramt budsjett for å sikre at økonomien er i balanse. Det betyr at kommunen må prioritere hardt mellom ulike tenester, og ikkje alt kan styrkast eller vidareførast som før. Målet er å sikra gode og trygge tenester til alle innbyggjarar, men det blir mindre rom for nye tiltak og ekstra satsingar.

Kva blir prioritert?

Heimetenesta vert styrka. Torhild Siggervåg

Kommunen vil bruke meir ressursar på helse og omsorg, spesielt heimetenester og legevakt. Det blir investert i omsorgsbustader og velferdsteknologi for å møte behovet til fleire eldre og personar med samansette behov. 

Denne prioriteringa kjem av at det blir fleire eldre og færre barn i åra som kjem. Dette gjer at behovet for helse- og omsorgstenester aukar, medan behovet for oppveksttenester går litt ned. Kommunen må derfor flytte ressursar frå oppvekst til helse for å sikra at alle får dei tenestene dei treng.

Skulane får ressursar til å oppfylla lærarnorm, og barnehagane får tilskot i tråd med tal barn. Barnevernet blir styrka etter behov, og kulturskule, bibliotek og symjehall blir oppretthaldne på dagens nivå.

Det blir vidare satsa på digitale løysingar som skal gjere det enklare for deg å ha kontakt med kommunen, og det blir jobba vidare med trafikksikring og vedlikehald av bygg og vegar.

Kva står på ventelista?

Av tiltak det ikkje er funne rom til i dette budsjettframlegget er mellom anna å styrka førebyggjande tenester og støtte til frivillige lag og organisasjonar. Det er heller ikkje funne rom for å auka budsjettet til brøyting, akutte reparasjonar eller ENØK-tiltak for å redusere straumkostnader.