Ny teknologi for betre tenester
Bømlo kommune har dei siste åra jobba målretta med å ta i bruk ny teknologi for å styrka tenestene sine. Målet er å gjera kvardagen enklare og tryggare – både for innbyggjarar og tilsette.
Kommunen har testa ut fleire digitale verktøy som brukar kunstig intelligens (KI). Mellom anna har me brukt den digitale hjelparen KommuneKari, og prøvd ut verktøy i skulen som kan gi betre oppfølging av elevar. Tilsette har fått tilgang til Copilot Chat og andre program som hjelper med planlegging, skriving og analyse.
Velferdsteknologi som gir tryggleik
Saman med Stord, Fitjar og Kvinnherad har Bømlo utvikla og kjøpt inn teknologi som gir betre tryggleik for brukarar av helse- og omsorgstenester. Nokre døme:
- Medisinmaskinar som minner brukarar om å ta medisinen sin. Dette har spart kommunen for over 1,5 millionar kroner.
- GPS og sensorar som gir tryggleik for personar med svekka hukommelse.
- Digitalt tilsyn som gjer at tilsette kan følgje med utan å vere fysisk til stades.
- Varsling via GPS som gir tryggleik for dei som jobbar ute.