Inngangsdøra i vest er herja med på gamle BUS.
Simon Knutsson Sortland
Utval for levekår møtest 1. september, utval for areal og samferdsle 2. september og formannskapet 3. september.
Vurderer stenging av gamle BUS
Ei av sakene som kan få størst merksemd, er framtida til gamle Bremnes ungdomsskule. Bygget har ikkje vore brukt til ordinær skuledrift sidan 2018. Samstundes brukar mellom anna ungdomsklubben og frivillige delar av bygget. Teknisk drift melder om utfordringar knytte til HMS, hærverk, brannfare og fare for personskade.
Kommunedirektøren meiner det ikkje er forsvarleg å halda fram med dagens bruk av bygget. Han ber derfor om fullmakt til å stengja heile eller delar av bygningsmassen. Kommunen skal samstundes vurdera om aktivitetar som ungdomsklubben og bruk av gymsalen kan halda fram dersom tryggleiken er god nok.
Nye reglar for spelemidlar
Formannskapet skal behandla ny forskrift om tilskot til bygging og rehabilitering av anlegg for idrett og fysisk aktivitet. Ei viktig endring i den statlege ordninga er at velforeiningar, grendalag og burettslag ikkje lenger kan søkja direkte om tilskot til nærmiljøanlegg.
For å få støtte må anlegget også vera med i kommunen sin plan for idrett og fysisk aktivitet. Endringane kan få konsekvensar for lag og organisasjonar som planlegg nye anlegg eller vil rehabilitera eksisterande anlegg.
Ny handlingsplan for helse og omsorg
Utval for levekår skal behandla revisjonen av handlingsplanen for helse, sosial og omsorg for 2027–2028. Kommunen får fleire eldre innbyggjarar, samtidig som det blir vanskelegare å rekruttera arbeidskraft. Planen legg derfor vekt på førebygging, rehabilitering, tidleg innsats og dag- og aktivitetstilbod. Målet er at fleire skal kunna meistra kvardagen lenger og klara seg utan omfattande tenester så lenge som mogleg.
Utvalet skal også senda forslag til ny forskrift om teljetidspunkt for private barnehagar på høyring og behandla ny lokal forskrift for SFO. Eitt av forslaga er å ikkje vidareføra det felleskommunale SFO-tilbodet i skuleferiane.
PwC-rapporten kjem til politisk behandling
PwC sin sluttrapport om plan- og byggesaksområdet skal behandlast i både utval for areal og samferdsle og i formannskapet. Rapporten peikar mellom anna på utfordringar knytte til kapasitet, arbeidsmiljø, samhandling, leiing og tillit. Kommunen har allereie sett i gang arbeid med fleire av utfordringane.
Formannskapet skal også behandla utbyggingsavtalen for Serklau og Regionstrategi Sunnhordland 2040.
Les sakspapira og sjå fullstendige saklister for dei politiske møta: