Statsforvaltaren ber Bømlo prioritera tydelegare

Ordførar Morten Helland orienterte under statsforvaltaren sitt besøk i Bømlo kommune. Simon Knutsson Sortland

Statsforvaltar Liv Signe Navarsete og nøkkelpersonell i hennar stab besøkte onsdag 26. november Bømlo kommune for å få eit samla inntrykk av tenestene, økonomien og planarbeidet vårt. Dagen gav rom for open dialog og ei grundig gjennomgang av status med både utfordringar og område der me er på rett veg. Kommunen var representert ved formannskapsmedlemer, kommuneadministrasjonen og tillitsvalde. På agendaen stod hovudtemaa tenesteyting, økonomi og styring, og samfunnsutvikling. 

Statsforvaltar Liv Signe Navarsete sette rama for møtet i si innleiing. - Statsforvaltaren ynskjer å vere ein samarbeidspartnar der me i dialog finn løysingar, samstundes som me av og til må vere strame i maska for å sikra etterleving av reglar og lovverk slik at innbyggjarane får det dei har krav på.  Vestland er landets mest verdiskapande fylke og me bør vere stolte av det me får til.

Krevjande situasjon i tenestene

Kommunalsjef oppvekst, kultur og idrett Torunn Laurhammer fekk gode tilbakemeldingar etter ho orienterte Statsforvaltaren om status og utfordringar i Bømlo kommune på området skule, barnehage og integrering. Simon Knutsson Sortland

Ordførar Morten Helland opna ved å ynskja velkomen og peika i si orientering særleg på at Bømlo er ein kommune med folketalsvekst. I sin presentasjon peika Statsforvaltaren på nokre område i kommunen som treng særleg merksemd:

• Helse og omsorg står i stort press på grunn av demografi og komplekse behov
• Barnevernet har markant auke i meldingar
• Barnehage og skule slit med rekruttering, inkludering og fallande elevtal

Kommunalsjef for oppvekst, kultur og idrett Torunn Laurhammer, kommunalsjef for helse og omsorg Kjell Magnar Mellesdal og kommunalsjef samfunnsutvikling Tone Stavland orienterte om status og utfordringar deira sektorar står i. 

- Me har stor tillit til Bømlo kommune på dette feltet, kommenterte direktør for utdanning og verjemål Anne Hjermann etter Laurhammer si orientering.

Mellesdal hadde to ting han ynskte å løfta fram for Statsforvaltaren. -  Me saknar nasjonal og tverrpolitisk støtte til den omstillinga som må til for å handtera dei aukande utgiftene i eldreomsorga. Dette vil merkast av alle. Me står på for å få til endringane. Tillitsvalde støttar oss, men me møter sterke motkrefter i samfunnet. Eg vil og løfta fram dei yngre brukarane i Habiliteringstenesta, sa kommunalsjefen.

Planvask til etterfølging for andre kommunar meiner statsforvaltar Liv Signe Navarsete (t.h) og Synnøve Stalheim kommunaldirektør etter formøte om Bømlo sitt arbeid med kommunedelen sin arealdel. Frå kommunen deltok formannskapsmedlem Anne T. Johannessen, utvalsleiar for areal og samferdsel Christer Agasøster, ordførar Morten Helland, fagansvarleg arealplan Renate Torkelsen, kommunalsjef samfunnutvikling Tone Stavland og avdelingsleiar arealbruk Lise Notland. Simon Knutsson Sortland

Ros for planarbeid og ryddigare styring

Trass i utfordringar fekk kommunen ros frå Navarsete for arbeidet med «planvask» og revisjon av overordna planverk for å samanstilla og rydda vekk utdaterte planar. – De har funne ein metode som kan vere mal for andre kommunar, meiner statsforvaltaren. Dette gir betre grunnlag for politiske val, mindre konflikt i arealsaker og meir føreseielege prosessar. Naturkartlegging, klima og planlegging langs sjø og vassdrag vart òg løfta fram som positivt.

Svake driftsresultat og likviditet var fokus under kommunedirektør Kjetil Aga Gjøsæter og økonomisjef Jarle Nakken (t.h) presenterte utfordringsbiletet for Bømlo sin kommuneøkonomi under Statsforvaltaren sitt besøk. Simon Knutsson Sortland

- ROBEK er inga katastrofe

Kommunedirektør Kjetil Aga Gjøsæter og økonomisjef Jarle Nakken tok for seg kommuneøkonomien. Dei peika på svake driftsresultat dei siste åra, lågt disposisjonsfond, negativ prognose for 2025,  svikt i fleire inntektsgrunnlag, svak likviditet og behov for likviditetslån for å betala ut løn. - Det er utfordrande, særleg med likviditeten. Likevel er det god driv i ein organisasjon med lite pengar, og me tek grep for a skapa berekraftige einingar og sjå korleis me kan drifta optimalt, understreka Aga Gjøsæter. 

Statsforvaltaren gav uttrykk for at Bømlo, som svært mange andre norske kommunar, står i ei krevjande økonomisk tid. – Men Bømlo syner at de har både kompetanse og handlekraft til å ta dei nødvendige grepa. Å hamna på ROBEK-lista er inga katastrofe, men eit kontrolltiltak for å sikra realistiske budsjett og god styring, påpeika Navarsete.

Må skapa felles forståing

Statsforvaltaren peika til slutt på behovet for å skapa ei felles forståing mellom politikk og administrasjon, tettare styring og betre rutinar i økonomiarbeidet, god intern kommunikasjon og medverknad, samt open og tydeleg informasjon til innbyggjarane. 

- Me ynskjer dykk lukke til med de gode arbeidet de driv, og no ser me fram til å få sjå vakre Bømlo i dagslys, avslutta statsforvaltar Liv Signe Navarsete. Saman med ordførar og kommunedirektøren avrunda dei bømlobesøket med synfaring i Bømlo fiskerihamn for å sjå den storstila utbygginga i Hovlandshagen.

Ordførar Morten Helland ynskte velkomen og orienterte om Bømlo kommune då statsforvaltar Liv Signe Navarsete med stab kom for å presentera kommunebilete for formannskapet, kommuneadministrasjonen og tillitsvalde. Simon Knutsson Sortland