Planvask til etterfølging for andre kommunar meinte tidlegare statsforvaltar Liv Signe Navarsete (t.h) og Synnøve Stalheim kommunaldirektør etter formøte om Bømlo sitt arbeid med kommunedelen sin arealdel ved sist besøk. Frå kommunen deltok formannskapsmedlem Anne T. Johannessen, utvalsleiar for areal og samferdsel Christer Agasøster, ordførar Morten Helland, fagansvarleg arealplan Renate Torkelsen, kommunalsjef samfunnutvikling Tone Stavland og avdelingsleiar arealbruk Lise Notland. (Arkivfoto).
Simon Knutsson Sortland
Målet med møtet er å få betre innsikt i rolla til Statsforvaltaren og å drøfta problemstillingar kommunen møter i plan- og byggjesaker. Møtet er fysisk og ope for alle som ønskjer å følgja det.
Samlinga med Statsforvaltaren vert halde i kommunestyresalen frå klokka 09.30. Etter lunsj er det ordinært møte i Utval for areal og samferdsle i formannsskapssalen kl. 13.00.
Dispensasjonar vert eit sentralt tema
Politikarane ønskjer mellom anna å få betre innsikt i kva rolle Statsforvaltaren har overfor kommunane, og korleis Statsforvaltaren samordnar arbeidet sitt innan ulike fagområde, til dømes plan og landbruk.
Eit sentralt tema blir dispensasjonar. Deltakarane skal mellom anna drøfta:
- når kommunen kan gi dispensasjon frå planar og føresegner
- kva handlingsrom kommunen har i slike saker
- korleis kommunen skal bruka skjønn
- korleis andre kommunar arbeider med dispensasjonar
- kva saker kommunen må senda til Statsforvaltaren på høyring
- plankrav og eldre utbyggingsområde
Politikarane ønskjer òg å ta opp krav om reguleringsplan. Bømlo har fleire eldre rorbuområde utan reguleringsplan. Når nokon ønskjer å fortetta slike område, kan det komma krav om å laga reguleringsplan. Utvalet ønskjer å drøfta korleis slike krav slår ut, mellom anna for dei siste som ønskjer å byggja i eit område som allereie i stor grad er utbygd.
Lokalt handlingsrom og samfunnsutvikling
Eit anna tema er forholdet mellom nasjonale og regionale omsyn og kommunen sitt ansvar for lokal samfunnsutvikling. Politikarane ønskjer å drøfta korleis kommunen kan gjera heilskaplege vurderingar når ulike sektoromsyn, til dømes landbruk og kulturminne, legg føringar for ei sak.
Dei ønskjer også å ta opp utfordringar med kart og databasar som ikkje alltid samsvarar med lokale forhold. Eit døme er areal som er registrerte som verdifulle landbruksareal, men som lokalt kan ha vore ute av drift over lang tid.
Administrasjonen ønskjer tydelegare avklaringar
Administrasjonen vil mellom anna ta opp om kommunen nyttar handlingsrommet godt nok i dispensasjonssaker. Eit anna spørsmål er kva saker kommunen faktisk treng å senda til Statsforvaltaren på høyring. Administrasjonen ønskjer tydelegare avklaringar om kva typar saker Statsforvaltaren har behov for å uttala seg om.
Frå utval for areal og samferdsel møter utvalsmedlemmene og ordføraren. Frå administrasjonen møter saksbehandlarar innan plan og byggjesak, avdelingsleiar, kommunalsjef og juridisk rådgjevar på eigedom. Statsforvaltaren møter med seksjonsleiar Kristin Nåmdal, kommunekontakt Frida Halland og seniorrådgjevar Nils Yndesdal.