Tillit er beredskap og Oliver Bergset i Bømlo kulturhus

Verdsdagen for psykisk helse har tillit og beredskap som tema. Illustrasjon

Mental Helse Bømlo, Bømlo ungdomsråd og Bømlo kommune inviterer til ei stor markering i Bømlo kulturhus. Årets tema er «Tillit er beredskap», med bodskapen #hverhandlingteller. Gjennom dagen får omlag tusen ungdomar frå ungdomsskulane, vidaregåande opplæring, BVO og Bømlo folkehøgskule delta på eigne arrangement med føredrag, kulturinnslag og panelsamtalar.

Oliver Bergset møter ungdomane

På dagtid møter ungdomane Oliver Bergset, kjend som programleiar i NRK og frå TV-programma «Kompani Lauritsen» og «Norges dummeste». Med humor, alvor og openheit om eigne erfaringar set han ord på kor viktig tillit er for psykisk helse og livsmeistring. Han når særleg godt fram til unge gutar, ei gruppe det ofte kan vera vanskeleg å få i tale.

Eit langsiktig arbeid for eit trygt lokalsamfunn

Bømlo kommune arbeider målretta med å førebyggja utanforskap, styrkja psykisk helse og skapa inkluderande fellesskap. Målet er at barn og unge skal oppleva tilhøyrsle, bli høyrde og vita kvar dei kan få hjelp når livet blir vanskeleg. Dette arbeidet krev samarbeid mellom ungdomane sjølve, familiar, skular, kommunale tenester, frivillige og lokalsamfunnet elles. Gode møteplassar, trygge vaksne og tidleg hjelp kan gjera ein viktig forskjell.

Gjennom prosjektet «Ordet Fangar» har ungdom sjølve bidrege i arbeidet for eit tryggare og meir inkluderande Bømlo. Ungdomsrådet har løfta fram korleis me kan førebyggja hatefulle ytringar og byggja respekt, tillit og fellesskap.  Markeringa av Verdsdagen for psykisk helse er ein del av dette arbeidet. Ho skal skapa openheit, gi kunnskap og gjera det lettare å snakka saman om psykisk helse.

Kveldsarrangement for alle

Klokka 19.00 inviterer arrangørane heile befolkninga til eit ope kveldsarrangement. Oliver Bergset held eit foredrag med særleg merksemd på korleis vaksne kan byggja tillit til barn og unge i kvardagen. Når ungdomar og vaksne får eit felles språk om psykisk helse, kan det gi betre samtalar heime, sterkare relasjonar og større forståing for kva som påverkar liva til ungdomane.

Ungdom og fagpersonar møtest til samtale

Kvelden held fram med ei panelsamtale om tillit, oppvekst og psykisk helse. Representantar frå Bømlo ungdomsråd møter kommunepsykolog og leiarar frå Barne- og familietenesta, ungdomsskulen og Psykisk helse og rus. Ungdomsrådet vil dela erfaringar frå «Ordet Fangar» og løfta fram kva unge treng for å kjenna seg høyrde og inkluderte.

Ordførar Morten Helland deltek. Publikum kan òg møta frivillige frå Mental Helse Bømlo i foajeen. Unge, lokale talent frå Bømlo kulturskule bidreg med musikalske innslag.

Tillit er beredskap. Når me ser, lyttar til og bryr oss om kvarandre, byggjer me eit sterkare og tryggare Bømlo.