Ordførar Morten Helland og dagleg leiar Leif Kåre Natterøy i Viergo AS i samtale om framtida for verksemda.
Simon Knutsson Sortland
“Dagen derpå” møter ordførar Morten Helland opp til intervju for NRK og lokale medier som intervjuar han og dagleg leiar Leif Kåre Natterøy i Viergo AS i tur og orden. Det er sjølvsagt dramatisk når ei industriverksemd av denne typen vert råka av ein slik brann. Her er 25 varig tilrettelagde arbeidsplassar.
Lær meir om Viergo AS
Verksemda er ei kompetanse- og opplæringsverksemd. På nettsida deira om oss skriv Viergo mellom anna: Føremålet vårt er å leggje til rette for at alle skal oppleve utvikling og auka livskvalitet gjennom meiningsfylt arbeid. Arbeid er verktøyet som bidreg til å utvikle ressursar, anten du er tilsett hos oss i Varig Tilrettelagt Arbeid (VTA), eller deltek i arbeidstrening gjennom tiltaket Arbeidsførebuande Trening via NAV. Er du uføretrygda, men ønskjer å nytte restarbeidsevna di, eller treng bistand til å kome i ordinært arbeid, har vi lang erfaring og god rettleiingskompetanse.
Heldigvis ingen skadde
- Heldigvis var dei fleste gått for dagen då det byrja å brenne, og dei som var i vaskeriet kom seg uskadde ut. N9o er det viktige å trygga våre tilsette og følgja dei opp på ein best mogleg måte. På litt sikt må me i leiinga saman med styret og kommunen finna ut den beste vegen for å byggja opp igjen det som gjekk tapt i brannen, seier dagleg leiar Leif Kåre Natterøy.
Trass store materielle øydeleggingar var det ingen personar som kom til skade i brannen i Hollundsdalen tysdag ettermiddag. Bygga rundt og to Rubbhallar klarte brannmannskapa å berga frå flammane, og dei klarte også å unngå at ein propantank i bakkant av området eksploderte.
Bakeriet og catering i vanleg drift
Tydeleg prega tilsette på bakeriet og resten av verksemda uttrykte alle ei stor glede av at ingen kom til skade og kor heldige dei trass alt har vore. Kundar som kom innom bakeriet uttrykte medkjensle og lurte på om tingingane deira no vart avlyste. Dei kunne gå heim i trygg forvissing om at Viergo leverer som avtalt. Forsyningar frå snikkarverkstaden til butikken vert noko skadelidande, men det er for detaljar å rekna.
Lokala der vaskeriet og snikkerverkstaden held til var dei som brant ned. Det vert no jobba med ulike løysingar for å løysa den viktige vaskejobben for institusjonane våre som Viergo no for ei stund framover ikkje kan levera. Handverksdelen hadde ein del nesten ferdige produkt og maskineri som gjeklk opp i flammar, men dei ser likevellyst på situasjonen.
- Me har fått tilbod om å låna både lokaler og utstyr slik at våre tilsette har ein jobb å gå til,og det er det viktigaste, seier nestleiar Idar Fardal i Viergo AS. Dei har også kontakt med søsterverksemder kringom i Sunnhordland og på Haugalandet.
- Eg må berre få gje stor ros til Bømlo brann og redning og naudetatane som bidrog, leiinga i Viergo AS og måten dei taklar denne situasjonen. Kva som skjer på litt lengre sikt må me ta i tur og orden. Det viktigaste no er å sikra at arbeidstakarane framleis kan kjenna på tryggleiken og livsmeistringa dei får gjennom jobben sin her. Det er eg viss på at blir løyst på beste måte, seier ordførar Morten Helland.