Kjøkenleiar Ann Mari Mikalsen orienterer ordførar Morten Helland (t.v) personalsjef Vanja Espeland og kommunedirektør Kjetil Aga Gjøsæter (t.h) under omvisinga etter kransaskålen for Bømlo bu og helsesenter sine nye produksjonslokale.
Simon Knutsson Sortland
Den største saka gjeld framlegget om å overføra 20,2 millionar kroner i ubrukte investeringsmidlar frå 2025 til 2026. Kommunedirektøren foreslår dette for å sikra framdrifta i prosjekt som allereie er sette i gang, har inngåtte kontraktar eller som kommunen vurderer som nødvendige å gjennomføra.
Saksinnkalling og møteprotokoll formannskapet 05.03.2026
Dei største overføringane gjeld:
- rehabilitering og ombygging av kjøkken ved Bømlo bu- og helsesenter - 8,9 millionar kroner
- fiskerihamn og RORO-rampe i Langevåg - 6,4 millionar kroner
- trafikksikringstiltak -3 millionar kroner
I tillegg gjeld overføringane midlar til digitalisering, nytt økonomi‑ og personalsystem og oppgradering av omsorg pluss-bustadar i Sokkelen på Bømlo bu- og helsesenter. Finansieringa skjer gjennom ubrukte lånemidlar, lån, momskompensasjon, ubundne investeringsfond og tilskot frå Kystverket.
På grunn av den krevjande økonomiske situasjonen kan ikkje kommunen føra vidare alle påbegynte investeringar, og prioriteringane skal sikra gjennomføring av dei mest kritiske prosjekta i 2026.
Kompensasjon for helseoppdrag
Brannvesenet handterer i dag fleire typar oppdrag som ligg i grenselandet mellom brann‑ og helsetenester, mellom anna knytt til akutte situasjonar og psykisk helse. Formannskapet skal vurdera innstilla til kommunestyret om korleis Bømlo brann og redning skal løysa helseoppdrag framover.
Desse oppdraga skjer i hovudsak utan fast økonomisk kompensasjon. Det er difor naudsynt å få avklaringar om ressursbruk, kompetanse, ansvar og risiko. Målet er å få ein tydelegare struktur for rolla brann- og redningstenesta skal ha, og korleis tenesta skal organiserast og finansierast.
Justeringar i planstrategien
Formannskapet skal òg gje innstilling til kommunestyret om endringar i planstrategien for Bømlo kommune 2024–2030. Justeringane handlar om å prioritera dei mest nødvendige og gjennomførbare planane innanfor dei økonomiske rammene kommunen har. Dette skal bidra til meir målretta bruk av ressursar i planarbeidet.
Kommunestyret skal gi høyringsfråsegn til NOU 2026:1 «En bærekraftig kommunesektor». etter innstilling frå formanskapet. Utgreiinga handlar om utfordringar innan kommuneøkonomi, styring og handlingsrom. Høyringsfråsegna gir Bømlo kommune høve til å løfta fram lokale erfaringar, behov og mogelege konsekvensar av forslaga i utgreiinga.