- Du må bli verdsleiande på ditt felt, understreka konsernsjef og grunnleggjar for LOS-gruppen Jakob Særsten då han fortalde om historikken og næringslivet sine utfordringar framover for for Høgre sine representantar under bedriftsbesøket i Rubbestadneset. Frå venstre Stortingsvararepresentant og styreleiar i Stord Næringsråd Liv Kari Eskeland (f.v), gruppeleiar Høgre i Vestland fylkeskommune Silja Ekeland Bjørkly, Stortingsrepresentant Erna Solberg, gruppeleiar i Bømlo Høgre Jørgen Søvold og dagleg leiar i Bømlo Næringsråd og varaordførar Ragnfrid Sønstabø hadde gode samtalar om næringsutvikling under møtet i Rubbestadneset.
ora Hodneland Kildehaug
Vår tidlegare statsminister Erna Solberg møtte representantar frå verksemdene Wärtsilä og LOS før turen til Stord og fleire møte med politiske og næringspolitiske aktørar i regionen. I Rubbestadneset fekk ho og følgjet ei orientering av ordførar Morten Helland. Han tok for seg føresetnadane, mangfaldet og styrkene til næringslivet i Bømlo som på fleire felt er verdsleiande innan maritim og marin sektor og går i front i det grøne skiftet i lag med resten av Vestlandet.
- Å ta vare på kompetansen, satsa på utdanning og lærlingeplassar er avgjerande for å bli verdsleiande. Utan er du ingenting, påpeika konsersjef Jakob Særsten. Han fortalde om historikken og framtidige utfordringar for LOS-gruppen. Ein må våga å satsa både i næringslivet men og i poltikken for at infrastruktur og rammevilkår skal spela på lag.
Klima, teknologi og beredskap
Samtalane under besøket tok opp tema som teknologisk utvikling, grøn omstilling, forsyningstryggleik og samanhengen mellom næringsutvikling og nasjonal beredskap. Salssjef Torgeir Sørvik viste korleis klimapolitikk, næringspolitikk og beredskap heng tett saman.
Aktiviteten innan olje og gass er framleis høg, men næringa står overfor endringar over tid. I den samanhengen vart det peikt på at ei føreseieleg og langsiktig klimapolitikk kan gi industrien rammer som legg til rette for investeringar, innovasjon og konkurransekraft.
Den maritime næringa i regionen har kompetanse og teknologi som kan bidra både til utsleppskutt og til å styrkja beredskapen. Dette vart òg teke med vidare i samtalane om Forsvaret si planlagde satsing på nye fartøy.
Les om storsatsinga til Wartsila og LOS-gruppen for å delta her
Kraft og industriell utvikling
Eit anna sentralt tema var kraftsituasjonen, både når det gjeld tilgang og distribusjon. Norsk kraftelektronikk er verdsleiande og i stor grad konsentrert til Vestlandet og Sunnhordland. Deltakarane peika på at det er viktig å halda fram satsinga for å ta vare på denne posisjonen i møte med aukande konkurranse.
Kritisk kompetanse for framtida
Overgang til meir berekraftige løysingar innan skipsfart, tenester og industri vart løfta fram som viktig for å sikra verdiskaping, arbeidsplassar og tilgang på kritisk kompetanse i framtida.
– Næringane må sjølve ta tak og synleggjera kva kompetanse dei treng framover. Fylkeskommunen vil gjera sitt for å tilpassa den yrkesfaglege og vidaregåande utdanninga, men det må vera samsvar mellom behova og utdanningsvegane, understreka Silja Ekeland Bjørkly, som sit i hovudutval for opplæring og kompetanse.
Særsten viste til at infrastrukturen og kompetansen allereie er på plass i regionen.
– Infrastrukturen ligg til rette for å etablera og lukkast med industri på Bømlo og i Sunnhordland, og kompetansen finst her. Det må me sikra også framover. Difor har me i LOS-gruppen alltid satsa mykje på lærlingar, og på å følgja elevane gjennom heile løpet frå skule til fagarbeidar, sa han.
Behov for langsiktige rammer
Det vart lagt vekt på at grøn teknologi allereie er tilgjengeleg, og at vidare utvikling krev tett dialog mellom næringsliv og styresmakter. Gode og langsiktige rammevilkår gir verksemdene betre grunnlag for å planleggja, utvikla nye løysingar og bidra aktivt i omstillinga. Samarbeidet mellom Wärtsilä og Eidesvik vart trekt fram som eit døme på dette.
Møtet viste verdien av møteplassar der politikarar og næringsliv kan utveksla erfaringar og synleggjera regionale behov. Slike møte bidreg til å tydeleggjera korleis klimaomstilling, næringsutvikling og beredskap heng tett saman lokalt, nasjonalt og globalt.
Stortingsvararepresentant og styreleiar i Stord Næringsråd Liv Kari Eskeland (f.v), gruppeleiar Høgre i Vestland fylkeskommune Silja Ekeland Bjørkly, administrerande direktør i Wärtsilä Norway, Hans-Petter Nesse, Stortingsrepresentant Erna Solberg, ordførar Morten Helland, konsernsjef og grunnleggjar for LOS Gruppen, Jakob Særsten og dagleg leiar i Bømlo Næringsråd og varaordførar Ragnfrid Sønstabø hadde gode samtalar om næringsutvikling under møtet i Rubbestadneset.
ora Hodneland Kildehaug