Formannskapet var ombord på den eine av to flåtar som er under utrustning hjå Scale AQ på Serklau nyleg.
Angela Zenteno
Forretningsutviklar Tom Jensen i ScaleAQ orienterte først formannskapet om at selskapet vil byggja vidare på satsinga si på Moster. - Bømlo er peika ut som ein sentral hub i sør grunna strategisk nærleik til kundar, leverandørmiljø og eigne kontor i regionen. Utbygginga er delt i to fasar, der fase ein alt er i gang med utrusting av betongflåtar, arealutviding, nytt lagerbygg og satsing på resirkulering. Me er særs nøgde med samarbeidet med politikarane og administrasjonen i Bømlo kommune for å få dette til, understreka Jensen.
Jensen og sitemanager Ståle Ytrøy fortalde at på sikt er målet å få på plass ei full verdikjede på Bømlo, med eiga dokk i fase to som del av arealutviding på 39.000 m². Målsetnaden er at anlegget på Serklau skal kunna handtera mellom 12 og 20 flåtar i året, og få kapasitet til å laga 80 til 100 flytekragar eller gjenbruksringar årleg. Vidare vekstplanar fram mot 2030 inneber meir lagerplass, servicefunksjonar og visingssenter.
- Me er glade for satsinga og imponert over det de får til og vil få til her, repliserte ordførar Morten Helland og var nøgd med at kommunen på denne måten syner seg som næringsvennleg. Då hadde Per Inge Ankervold losa han og politikarkollegane, saman med kommunedirektør Kjetil Aga Gjøsæter og Ingrid Esperø i Invest in Sunnhordland, gjennom ei omvising i den eine av to oppdrettsflåtar som no er inne til utrustning. Moster Elektro og Norgeshus Bømlo sentrale underleverandørar.
Kort fakta ScaleAQ Group
- 975 tilsette og 3,8 mrd. kr i omsetnad
- Moster er peika ut som selskapet sin hub i sør
- Fase 1 på Bømlo er i gang med utrusting av betongflåtar og arealutviding på 39.000 m²
- Fase 2 er planlagt med full verdikjede og eiga dokk
- Målet er kapasitet til 12–20 flåtar årleg og 80–100 flytekragar/gjenbruksringar i året
Samstemte i møte
Tilbake i formannskapssalen hadde politikarane fleire sentrale saker på bordet som handlar om investeringar, tryggleik og langsiktig planlegging i kommunen. Dei gjekk stort sett samrøystes gjennom. Meir detaljert om sakene i Innkalling og protokoll formannskapsmøte 05.03.2026
I si orientering opplyste kommunedirektør Kjetil Aga Gjøsæter om at sjukefråveret i januar landa på 9,7 prosent, noko som er ei betring sidan november og desember, men ikkje nok til at trendlinja held seg positiv. Driftsrapporten for januar er sterkt førebels, men viser eit mindreforbruk på 3,2 millionar kroner i den første månaden.
Status for investeringar:
- Arbeidet med Våge skule er i gang, med vurderingar av omprogrammering, plassering av klasseromsbygg og vegløysingar.
- Kjøkken og ombygging ved BBH blir stilt ferdig neste månad og held seg innanfor budsjettet.
- Det er behov for tak over heimetenestebilar ved BBH, og prosjektutvikling pågår.
- Nytt pasientvarslingsanlegg (velferdsteknologi) på Bømlo bu- og helsesenter har mål om installasjon innan hausten 2026.
- Sunnhordlandskommunane set i gang ein felles anbodskonkurranse for helse- og legevikartenester, etter at manglande kapasitet tidlegare stoppa arbeidet.
- Serklau‑prosjektet har framdrift trass konkurs i B&G
- Kaien i Brubakken er selt for 2,9 millionar kroner. Vedtaket frå kommunestyret i 2024 om sal av dei kommunale kaiane Moster, Bømmelhavn og Brubakken er no gjennomført
Kommunalsjef helse, sosial og omsorg Kjell Magnar Mellesdal orienter formannskapet om kommunale omsorgsbustadar og andre utfordringar innan helsesektoren.
Simon Knutsson Sortland
Kommunale omsorgsbustadar
Kommunedirektøren orienterte vidare om status for kommunale omsorgsbustadar. Sokkelen ved Bømlo bu- og helsesenter har 14 bustader. Bustadane skal rehabiliterast og omgjerast til omsorg pluss bustader, altså for brukarar med omfattande og samansette hjelpebehov. Prosjektet blir sendt ut på anbod innan kort tid, og er eit prosjekt ein forventar tilskot frå Husbanken.
Det pågår drøftingar for å lande plan for skisseprosjekt på Teiglandshagen/Moster. Prosjektet inneheld 4-5 forsterka skjerma institusjonsplassar tilknytt Teiglandshagen samt 6 omsorgsbustader, og er beskrive i kommunen sin investeringsplan. Privat aktør ynskjer i same reguleringsplan å etablere 12 bueiningar på andre sida av vegen.
Det pågår eit samarbeid mellom Langevåg i vekst, ei lokal arbeidsgruppe og Bømlo kommune i høve utvikling av innhald, aktivitetar og bygg ved Bømlo omsorgstun.
Kommunalsjef helse, sosial og omsorg Kjell Magnar Mellesdal, som går av med pensjon i haust, orienterte formannskapet om kva planar og vedtak helsesektoren i Bømlo jobbar etter. Han gav ein kort status som syner det er stort press på våre tenester, og kva tiltak me jobbar med for å møta endringane i alderssamansetnaden i samfunnet (demografien). Me kjem tilbake med eiga sak om dette.