Formannskapet får orientering om Rusmiddelpolitisk handlingsplan av SLT-koordinator John Henrik Staveland Sæter.
Simon Knutsson Sortland
Administrasjonsutvalet er formannskapet utvida med hovudtillitsvalde og hovudverneombod. Etter møtet der dei fekk økonomisk statusrapport frå kommunedirektør Kjetil Aga Gjøsæter og løypemelding om den eksterne revisjonen av kommunal drift var det møte i formannskapet. SLT-koordinator John Henrik Staveland Sæter orienterte her om Rusmiddelpolitisk handlingsplan før ordinær saksbehandling tok til.
Formannskapsmedlemene hadde også ekskursjon til Langevåg og møte med Hovlandshagen Utvikling og besøk på «Tautiki», Napier sitt nyaste prosessskip/bløggebåt.
Møteinnkalling og protokoll formannskapet 16.04.2026
Politisk prosess før endringar vedtakast
I si orientering til formannskapet oppmoda kommunedirektøren mellom anna om at ein ikkje blandar saman dei to eksterne gjennomgangane av kommunal drift som heilskap og gjenommgang av seksjon samfunnsutvikling. Det er konsulentselskapet PwC som står for begge, men det er kommunestyret som etter ein politisk prosess endeleg skal avgjera om eventuelle endringar eller tiltak som vert føreslegne skal setjast i verk.
Formannskapet vedtok samrøystes eit undervegsvedtak til revidering av kommuneplanen sin arealdel (KPA) med godkjenning av planvask, konsekvensutgreiing og endra metode for byggjegrensa i tråd med kommunedirektøren sitt framlegg. Dei vedtok også samrøystes at byste av komponisten Harald Sæverud kan plasserast på kommunal eigedom i samsvar med forslag til plassering frå Bremnes Sogelag. Sogelaget tek på seg ansvaret for etablering og vedlikehald av bysta.
Fotball-VM og skjenking
Formannskapet vedtok mot KrF sine to røyster at skjenkestadar som ynskjer å ha ope om natta og viser VM fotball i perioden 11. juni til 19. juli 2026 kan skjenke alkohol i gruppe 1 og 2 (øl og vin) fram til kl. 06.00. Vedtaket forutsetter at skjenkestad har sendt søknad til Bømlo kommune før fotball-VM startar, og under forutsetning av at forslaget frå helse- og omsorgsdirektoratet vert vedtatt.
Kulleseidkanalen Gjestehamn har gjort endringar i inne- og uteareala samanlikna med det som låg til grunn då skjenkeløyvet vart gjeve i 2024. Nye teikningar er vedlagt i rapporten frå Norconsult. Skjenkeløyvet frå 2024 spesifiserte både skjenkeareal og godkjent persontal som vart oppgjeve i innsendt søknadsskjema. Formannskapet gir samrøystes Kulleseidkanalen Gjestehamn oppdatert skjenkeløyve for alkoholgruppe 1, 2 og 3 på godkjent skjenkeareal inne og ute på Kanalvegen 24 etter fastsette vilkår.
Nedgang i sjukefråværet
I sin driftsrapport peikar kommunedirektøren på at sjukefråværet gjekk markant ned i mars, særleg korttidsfråværet. Bømlo ligg lågt i kostnader til sjukefråvær samanlikna med andre kommunar, noko KS sin nye modell viser. Ny driftsrapport per mars er klar, med oppdatert versjon etter innspel frå tenestene. Årsmelding for 2025 er ferdigstilt og sendt kontrollutval og revisjon, medan rekneskapen blir handsama politisk i juni.
Prosessen med rekruttering av kommunalsjef helse pågår. I oppvekstsektoren er det fokus på dagleg drift, utviklingsarbeid og planlegging av neste skuleår. Helseområdet arbeider med bustadstruktur, medan samfunnsavdelinga har hovudfokus på KPA og planarbeid.
BBH-kjøkenet i drift
Planlegginga av Våge skule er teken opp att, og kjøkenet ved Bømlo bu- og helsesenter er ferdig og i drift. Det blir arbeidd vidare med samlokalisering av barne- og familietenesta. Fleire prosjekt er under utvikling, mellom anna pasientvarslingsanlegg, omsorgsbustader på Moster og Teiglandshagen, samt tiltak knytt til BBH, stigar i Kulleseidkanalen og tak over tenestebilar. Samarbeid med lokale aktørar er sentralt i utviklinga av omsorgstun og bustader.
Det er få ledige lærarstillingar neste skuleår grunna lågare elevtal, noko som gir stabilitet men utfordrar rekruttering. Kommunen arbeider med høyringssvar på ny integreringsstønad for flyktningar. Det pågår dialog og oppfølging knytt til Moster Amfi, inkludert drift, økonomi og mogleg statleg finansiering. ROS-analysen er gjennomført, og beredskapsråd blir halde med nasjonale aktørar i morgon. Utviklinga i Svortland burettslag blir vurdert som positiv, med betre organisering, økonomi og buforhold.